مدينة بدر اليوم كل ما يتعلق بأخبار مدينة بدر و مشروع شقق الاسكان الاجتماعى, وزارة الاسكان, طرح الأراضي, هيئة المجتمعات العمرانية الجديدة, دار مصر, سكن مصر
قصة جروب جت فى السوستة
القصة الحقيقية يرويها ادمن الجروب
كتب بواسطة : محمد حسين
قصة جروب جت فى السوستة :
كل الاسئلة والاجوبة التى تدور بالاذهان يجاوب عليها ادمن الجروب قى صورة سؤال وجواب
ايه قصة جت في السوستة ؟
محمد عبد الغفار ( المشهور ب : محمد جيرى ) مؤسس الجروب كان عنده مشكله في الخصية وكان قلقان ان كان هيضره مستقبلا في جوازه ,
وعلشان الموضوع حساس جمع ١٠٠ من اصدقاءه المتزوجين علشان يستشيرهم فى مشكلته وال 100 جابوا 100 كمان و ال 100 جابو 1000
لحد ما وصل للعدد ده.
اولا – اشمعنى اختار المؤسس اسم للجروب ( جت في السوستة ) ؟
هو كان ناوي يسميه ( جت في الخصية ) بس لقاها تقيلة شوية فقرر يسميه ( جت في السوستة )
ثانيا – بعد ما الجروب انتشر , ليه مغيرتوش الاسم ؟
الاسم ده مميز جدا لانه غير فكر ملايين الناس الي بتبص على الكتاب من بره بس و اثبت للدنيا كلها ان المحتوى اهم بكثير من العنوان ,
الاسم دلوقتي بقى براند وليه صيته الي انتشر بيه و سمعته الكويسة الي بين الناس بسبب أفعال الأعضاء الي فيه ,
وبينضرب بيه المثل , فمفيش داعي لتغيير الحاجة الجميلة دي , وان كان هيحصل تغيير كان يبقى لازم قبل ما نوصل 5000 عضو ,,
وصدقني لو كان الاسم اتغير ساعتها مكانش الجروب هيوصل للي وصله دلوقتي.
ثالثا – ايه أهداف الجروب ؟
اهدافنا اننا نرجع ايد واحدة وشعب واحد و نتجمع تانى زى الاول نحاول نبعد عن اى حاجه بتفرقنا ,
الفتره اللى فاتت وبسبب الاحداث السياسيه حصل خلافات كتير وانقسامات في المجتمع و خسرنا نفسنا و اهلنا و جيراننا ,
احنا عايزين نرجع الروح الي كانت موجودة زمان وجدعنة زمان ورجالة زمان .
رابعا – مين ينفع يدخل الجروب ؟
شروط الانضمام انك تكون راجل مش بنت وانك تلتزم بالقوانين وتحترم غيرك , بس.
خامسا – ليه البنات ممنوعة من الدخول للجروب ؟
احنا مش ضد البنات ومقدرين دورهم وهما اساس المجتمع , فيهم امى واختى وبنتى , لكن احنا هنا رجاله بس علشان ناخد راحتنا فى الكلام ,
ونرفع الحرج في السؤال و ميبقاش في تصنع ومحدش يحلو قدامهم باي شكل من الاشكال.
سادسا – نزلت بوست ومتقبلش , ايه انواع البوستات الي مبتتقبلش ؟
– البوستات السياسية ايا كانت.
– الكوميكس بانواعها.
– بوستات طلب افكار لمشاريع او طلب شركاء في مشاريع.
– بوستات فيها صور بنات.
– بسوتات فيها لينكات خارجية لصفحات او جروبات تانية او مواقع.
– بوستات منقولة من جروبات تانية او صفحات تانية.
– بوستات التحية و التمسية.
– بوستات الحب والغزل.
– بوستات الشعر والأدب المنقول.
– بوستات الشكر في الجروب والترحيب.
– بوستات طلب المتابعات واللايكات.
– بوستات تكملة الارقام او الايات اوالخ.
– بوستات الصلاة على النبي.
– بوستات اسماء الله الحسنى.
– بوستات اكتب شيء تؤجر عليه.
– بوستات طلب الفولو واللايكات والشير.
– بوستات طلب الدعاء والترحم والمباركة.
– بوستات الاسئلة من نوع ( اللابتوب بيهنج ايه الحل او الموبايل مش عارفه افتحه ) ؟ واخواتها.
– بوستات الأسئلة من نوع ( ازاي افك باسوورد التلفون او ازاي الغي الباسوورد او افتح الاي كلاود ) ؟ واخواتها.
– بوستات تعليم الهكر او طلب الهكر او برامج الهكر.
– بوستات طلب المساعدات.
– بوستات اكتب حاجة تاخد عليها حسنة.
– بوستات الفوركس.
– بوستات طلب معلومات شخصية عن اي شخص ايا كان.
– بوستات المفقودين المنقولة.
– بوستات طلب ريبورت لصفحة معينة او عمل ريبورتات لاكاونت شخص.
– بوستات التبليغ عن حاجة مسروفة.
– بوستات طلب اسامي مواليد جدد.
– بوستات الاعلانات يُستثنى منها إعلانات أصحاب المهن والحرف ( الصنايعية ).
– بوستات مشاركة من صفحات وجروبات أخرى ايا كانت.
– بوستات طلب ملأ الإستبيانات
– بوستات الاعلانات ايا كانت ( لا يستثنى منها اصحاب المهن )
سابعا – ليه في بوستات مش مخالفة بتتأخر في النزول ؟ وايه الحل ؟
بسبب عدد البوستات اللي بتنزل لنا ف الفلتر بتوصل ل 3000 بوست ف الساعه اغلبها مخالف ومتكرر ودا بيعطلنا عن قبول البوستات المش مخالفة
والحل انك تمسح البوست القديم وتنزله تاني من الاول – لو البوست مش مخالف – علشان يطلع فوق, لان الفلتر بيظهر قدامنا من الاحدث إلى الأقدم ↓↓ مش العكس.
ثامنا – ناس كتير بشوفها بتتطرد يوميا من الجروب , ايه سبب طرد الاعضاء ؟
الحالات الي بتستدعي الطرد والحظر هي كالتالي :
يطرد ويحظر اي عضو يقوم بإهانة عضو اخر باي شكل من الاشكال.
طرد ويحظر العضو في حال مخالفة قواعد النشر
يطرد ويحظر العضو في حال نشر نفس البوست كذا مرة.
يطرد ويحظر اي عضو يظهر منه اي دلالة على عنصرية او تحيز لانتماء سياسي او كروي معين.
يطرد ويحظر اي عضو يتعمد المخالفة الصريحة لقواعد النشر.
يطرد ويحظر اي عضو يقوم باضافة اي بنت للجروب.
يطرد و يحظر اي عضو يقوم باخذ صور من الجروب وعرضها في صفحته الشخصية او جروبات اخرى.
يطرد ويحظر اي عضو يقوم بالتطاول على الجروب او احد اعضاءه داخل او خارج الجروب.
يطرد ويحظر اي عضو يقوم بتعديل محتوى البوست لشيء اخر بعد قبوله.
يطرد ويحظر اي عضو يقوم بنشر اعلانات في التعليقات الخاصة ببوست اخر , ويطرد فقط في حالة نشر تعليق لا علاقة له بالبوست المنشور.
يحذف اي عضو في حال وجود زخارف في اسمه باي شكل من الاشكال.
تاسعا – ايه لجان الادارة ووظيفتها في الجروب ؟
في عندنا 3 لجان رئيسية حاليا :
لجنة المساعدات : بتستقبل طلبات المساعدات وتفرزها.
لجنة الاعلانات : بتستقبل الاعلانات وتنسق مع المعلنين.
لجنة المواهب : بتستقبل مواهب السوستجية وتنزلها في القناة.
لجنه الوظائف : بتستقبل طلبات الوظائف من الأعضاء و عروض التوظيف من الشركات وتوفق ما بينهم.
اللجنة القانونية : بتستقبل مشاكل الاعضاء القانونية وتحاول المساعدة وتقديم الحلول
وممكن تتواصلوا مع اي فرد فيهم
عاشرا – ليه فيه بوستات تافهه بتنزل وسايبين المهم والمساعدات ؟
الجروب هدفه الاسمى الهلس الهادف نوصل كلنا لمرحلة اننا بنسند بعض واحنا بنضحك ومبسوطين – بوستات المساعدات مش بنقبلها تجنبا لحالات النصب
لذلك عملنا لها ايميل خاص لن تقبل الا عن طريقهو البوسه التافه بالنسبه لك , خلى حد غيرك يضحك ويطلع من مود وحش كان فيه
الحادى عشر – حاولت انزل بوست ملقتش مكان للكتابة ؟ هل انا ممنوع من النشر ؟
انت مش ممنوع من النشر لا , البوستات كل يوم بتتقفل من الساعة 12 للساعة 6 لاعطاء فرصة للأدمن لفلترة البوستات الي نزلت وتخفيف الضغط شوية.
الثانى عشر – نزلت بوست طلب تغيير خلفية او ايديت بالفوتوشوب ومتقبلش ؟
البوستات دي كترت جدا و عشان ننظم العملية شوية عملنا بوست خاص بيها ممكن حضرتك تنزل طلبك لتعديل الصور فيه من هنا:
الثالث عشر – نزلت بوست بسأل عن دكتور عيون او مين في المنطقة الفلانية عشان اتعرف عليهم ومنزلش ؟
اكيد البوست ده نزل منه قبل كده ومنعا للتكرار البوستات المشابهة مبتتقبلش , يا ريت حضرتك تستخدم خاصية البحث في الجروب قبل ما تنزل سؤال ,
لو بحثت وملقتش اجابة ساعتها ممكن تبعت سؤال في بوست جديد.
طريقة البحث موجودة في البوست ده لو متعرفش يا ريت تراجعها
الرابع عشر – نزلت بوست عن حالة محتاجة مساعدة ومتقبلش , ايه الحالات الانسانية الي بتساعدوها وايه الي بيترفض ؟
المساعدات لازم تعدي على لجنة المساعدات وهي بتتاكد منها وبنحاول نعمل كل الي نقدر عليه بعد كده , وبنتبنى الحالات اللي نقدر نساعدها
وتكون في حدود المتاح لينا والتكلفه الماديه تكون بسيطه ونقدر نلمها من التبرعات و دائما الاولويه عندنا للحالات المرضيه والانسانيه بس.
الخامس عشر – نزلت حاجة عايز ابيعها ومتقبلتش / نزلت اعلان ومتقبلش ليه ؟
الاعلانات نوعين على الجروب :
اعلانات مجانية لأصحاب المهن والحرفيين ( الصنايعية )
ودي لازم تعدي على لجنة الإعلانات وهي المختصة انها تنزل العلانات دي بشكل كويس ,
اللي حابب يتواصل معاهم ( راجع اعلانات مدفوعة بناخد عليها
مبالغ رمزية جدا و بتروح تبرعات للحالات الي بنساعدها
وسعر الاعلانات مش موحد , الشركة الكبيرة هتدفع اكتر من الشركة الصغيرة والمحل المشهور هيدفع اكترمن المحل الصغير و هكذا ,
والاعلانات لازم تعدي على لجنة الإعلانات قبل ما تنزل و اللي حابب يتواصل معاهم
( راجع سؤال 10).
السادس عشر – نزلت بوست طلب شير من صفحتي عشان اخد ( تلفون , شقة , عربية , غسالة , ميكروويف ,, الخ ) ومتقلبش ؟
اولا مفيش حد هيديلك حاجة بمجرد انك تعمله شير , ودائما هتلاقي الشروط تعقيدية عشان هما عارفين انهم مش هيدوك حاجة
و لما انت تحاول و تعمل شير مرة واتنين و الف هما هيكونوا استفادوا منك وانت لا , ثانيا بوستات الشير و طلب الفولو ممنوعة من الجروب
والمنع اشد للبوستات دي لاستغلالها الناس.
السابع عشر – انا بشوف بوستات كتير تافهة / مخالفة بتنزل , اعمل ايه لما اشوفها ؟
احنا اتفقنا قبل كده ان مفيش حاجة تافهة وان في اختلاف وجهات نظر لازم نحترمه ونرتقي بنفسنا شوية المقياس عندنا
هل البوست الي نزل ده – مخالف ولا مش مخالف – لو في بوست مخالف نزل مننا بالخطأ يبقى لازم تعمله ريبورت او تمنشن حد من الادمن واحنا هنتصرف علطول ان شاء الله.
.
.
الثامن عشر – بشوف كومنتات مخلة بالاداب او فيها شتايم , اعمل ايه ؟
اي كومنت تلاقيه فيه شتايم او كلام مخل لازم حضرتك تبلغنا علطول عن طريق الريبورت او منشن لحد من الادمن واحنا هنتصرف علطول ان شاء الله.
التاسع عشر – لو لمينا من كل واحد جنيه هايكون معانا مليون ٧٠٠ الف نفتح اى مشروع ليه مانعملش الموضوع ده ؟
الموضوع مش سهل واحنا شغالين عليه وفى ناس متخصصين بيدرسوا الموضوع من الناحيه القانوينه وان شاء الله قريب هايكون فى مشروع يجمعنا كلنا.
العشرين – ليه مبتتكلموش عن بورما وسوريا و المشاكل الي بتحصل في العالم حوالينا ؟
لان دايما الموضوع هيتحول من انساني لسياسي و احنا اتقفنا اننا ملناش في السياسة , ده غير ان مفيش بإيدينا حاجة نعملها ليهم غير الدعاء
او التبرع وكل واحد على قد ما يقدر , مش عايزين ندخل الجروب في حاجة هو مش قدها.
الواحد والعشرين – هل فعلا بقى للجروب صفحة ؟ ونوصلها ازاي ؟
فعلا بقى في صفحة للجروب وتقدروا تدخلوها
الثانى والعشرين – ليه عملتوا صفحة ؟ وهل هتأثر على الجروب ؟
الصفحة اتعملت عشان في جروبات كتير معمولة بنفس الاسم و عملوا صفحات كمان باسمنا وبقو ينشروا حجات مسيئة ,
و بالتالي هنلبس احنا في الحجات الغلط دي من غير ما نكون احنا السبب فيها و بالتالي كان لازم واجهة اعلامية رسمية ظاهرة قدام الناس كلها واضحة
وهي الصفحة وده برضه هيساعدنا اننا نوثق الجروب و نقفل بقية الصفحات والجروبات المزيفة ,, و الجروب هيفضل زي ما هو بنفس قوانينه مفيش حاجة هتتغير.
الثالث والعشرين – ليه الاسامي المزخرفة ممنوعة ؟
عشان بيكون في صعوبة على الادمن لما ييجي يدور على الشخص ده لو عمل مخالفة واحتاج يوصل له
الرابع والعشرين – بشوف ناس بتطلع على الجروب لايف , مين الي ممكن يطلع معاكم ؟ ولو ينفع انا اشارك معاكم واطلع لايف وافيد الناس واتكلم معاهم في موضوع معين , أعمل ايه ؟
الكل مرحب بيه انه يطلع معانا لايف طالما هيتكلم في موضوع هادف أو هيعرض موهبة كويسة , الي حابب يطلع ممكن انه يتواصل مع الادمن هادي القرباوي وده لينك البروفايل بتاعه
الخامس والعشرين – عندي موهبة وحابب أعرضها ممكن انزل بيها بوست ؟
ممكن تنشر موهبتك الشخصية ع الجروب دايركت أو شير من الصفحة الشخصية فقط ( اي شير من صفحات خارجية ممنوع ليس فقط المواهب ) ,
و المواهب اللي هتشارك في المسابقة الفنية فقط هيا اللي تبعت على إيميل المواهب (راجع سؤال 10).
.
السادس والعشرين – انا عندي افكار عايز اطرحها عليكم , ابعت لمين ؟
ممكن تبعتلنا افكارك
.
السابع والعشرين – انا عندي استعداد ابقى مشرف معاكم واساعد في الجروب , اكلم مين ؟
ممكن تبعتلنا طلب انضمام
الثامن والعشرين – انا عايز ابلغ عن شكوى او مشكلة بيني وبين عضو او ادمن , ابلغكم ازاي ؟
ممكن تبعتلنا الشكوى
.
التاسع والعشرين – انا سمعت ان الجروب متضيق عليه امنيا , الكلام ده صحيح ؟
الكلام ده غير صحيح بالمرة ومفيش علينا اي تضييق امني باي شكل من الاشكال.
الثلاثون – ايه الي اقدر اعمله عشان اساعدكم ؟
– اخرج من اي جروب او صفحة مقلدة لينا او باسمنا او فيها جزء من اسمنا.
– الالتزام بالقوانين.
– عدم نشر بوستات مخالفة .
– بتوعية بقية الاعضاء بالقوانين.
– عمل منشن لأحد الادمن في حالة وجود مخالفة في الكومنتات.
– تقديم تقرير في حال وجود بوست مخالف.
– مساعدة الغير قدر الإستطاعة.
– لو هتعمل ( اب ) او (up) او (يا رب) على بوست عشان ترفعه اعمل مرة واحدة وهتأدي الغرض.
واحد وثلاثون – ازاي أوصل للأدمن والمشرفين الي في الجروب وأكلمهم ؟
ادخل على قائمة الاعضاء الخاصة بالجروب و روح على خانة المشرفين والادارة و هيطلعلك الادمن كلهم ممكن تدخل تكلم اي حد فيهم
اثنان وثلاثون – ليه مش عارف اعمل شير جوه الجروب ؟ ليه الشير مقفول عندي ؟
الشير مش مقفول عندك انت بس , الشير مقفول لكل الاعضاء في الجروب لان الجروب سري وبالتالي مينفعش انك تعمل شير لأي حاجة بره الجروب ,,
ممكن انك تاخد اللينك بتاع البوست و تحطه في مكان البوستات في صفحتك الشخصية , وده هيعمل شير ولكن محدش هيشفوله
الا اصدقاءك الي موجودين في الجروب هنا بس
ملاحظة : القوانين والقواعد و الاستثنائات قابلة للتعديل من جانب الإدارة في اي وقت دون الحاجة للرجوع إلى الأعضاء.
ثلاثة وثلاثون – نزلت بوست لحد من عيلتي او اعرفه شخصيا مختفي / مفقود ومتقبلش ليه ؟
بوستات المفقوين والمتغيبين والمختفين ممنوعة الا في الحالات الشخصية فقط , يعني لازم يكون الشخص ده تعرفه شخصيا
ولازم يكون البوست كامل المعالم وواضح وفيه كل المعلومات ووسائل الاتصال عشان حد من الادمن يقدر يتواصل معاك ويتأكد من الحالة ,
وبعد التأكد ان شاء الله بيتم النشر
اربعة وثلاثون – بسمع كتير ناس بتقول ان الجروب للهلس الهادف ,, يعني ايه الهلس الهادف ؟
الهلس الهادف ده حاجه حصلت فاحنا سميناها علس هادف..ايه يا عم اللي حصل؟
ناس اتجمعت تتكلم عن مشاكلها الجنسيه بشكل هزلي جدا..
فانت تقرا البوست فتضحك فيتفتح باب من قلبك لقب البي كتب مشكلته بكل رجوله.
فتنصحه نصيحه من قلبك مش مصتنعه
فتلاقي نفسك بتقضي ساعات حواليك هاله من الفرحه بتخرج من اقل بوست بخمس اصدقاء …
السر كان محفوظ و الرجوله صوتها عالي و ده اللي سبب شهره جروبنا.
حبة مساعدات و حبة نكت و حبة مشاكل مجتمع وحبة سف و حبة حفلة على حد معين ,, شلة صحاب مع بعض واخوات ,,
احنا مش جروب مساعدات بأي شكل من الاشكال ,, المساعدات دي هي اصغر جزء في الجروب ومش الفكرة الي قام عليها من الاساس.
ملاحظة : القوانين و المخالفات ممكن يتم تعديلها في اي وقت من الاوقات من قبل الادارة ودن الحاجة للرجوع للأعضاء
و تعتبر القوانين فعالة من تاريخ تحديث البوست .
اخيرا نحب نقولكم اننا بحاول على قد ما نقدر نكون عند حسن ظنكم دائما و سامحونا على اي تقصير من ناحيتنا ,, #دمتم_سوستجية !
وهذة هى قصة جروب جت فى السوستة
تابعونا على موقع مدينة بدر اليوم
تابعونا على صفحتنا على الفيس بوك مدينة بدر اليوم
